AgroStar Naxçıvanda keçirilən "Aqro festival"da iştirak edib
Naxçıvan Muxtar Respublikası Kənd Təsərrüfatı Nazirliyinin təşkilatçılığı ilə Naxçıvanda ilk dəfə "Aqro festival" keçirilib. Festival iştirakçıları əvvəlcə Ümummilli Lider Heydər Əliyevin Naxçıvan şəhərinin baş meydanında ucalan abidəsini ziyarət edib, önünə gül dəstələri qoyub, dahi şəxsiyyətin xatirəsini ehtiramla yad ediblər.
Heydər Əliyev Muzeyində olan ziyarətçilər dahi şəxsiyyətin həyatını və çoxşaxəli dövlətçilik fəaliyyətini əks etdirən eksponatlarla tanış olduqdan sonra festivalın keçirildiyi Sahil Parkına gəliblər.
45 şirkət və 55 ailə təsərrüfatçılarının iştirak etdiyi festivalda müxtəlif kənd təsərrüfatı texnikaları, toxum, gübrə və digər istehsal vasitələrinin, o cümlədən kənd təsərrüfatı məhsullarının nümayişi və satışı həyata keçirilir.
Festivalda AgroStar şirkəti ziyarətçilərə məhsuldar, sertifikatlı arpa, buğda tərəvəz toxumları o cümlədən aqrar xidmətlər təqdim ediblər. İki gün davam edən festival ziyarətçilərin marağına səbəb olmuşdur.
